29 de Agosto 2015

Fae 20 años, 14 mineros muertos

L`acidente más gordu de la cabera época sacudió les Cuenques Mineres, non solo d`Asturies, sinon de too`l estáu, sacudió la concenza obrera por too l`estáu español, trespasó fronteres, tanto como la muerte que nun dubió en llevase a mineros asturianos y checos... Yera un 31 d`agostu que poques persones en Mieres, conceyu onde aún furrula el pozu Nicolasa (o San Nicolás como se conoz oficialmente) podrán escaecer en tola so vida. Nin esi díi, nin los siguientes onde`l silenciu estendíase como una llosa so les casi de tolos pueblos d`estos valles, onde la mina y la desgracia tantu tiempu trabayen xuntes.

Foi un tiempu nel que tamién apaecieron los aguarones, les rates de dos pates qu`apaecieron pa dar pésames y condocencies de cartón-piedra a unes families y compañeros de los cayíos, a una xente que llavaba la so pena con llágrimes y rabia. Príncipes, reis, presidentes, empresarios, curia, lacayos y otres autoridades punxeron fociquinos de pena mercada de saldu, pa presentase nos homenaxes o mandar pésames de curtia-pega. Los mesmos que insultaben a los mineros llamándolos “vagos”, “mangantes”, “aprovechaos”, y mandaben a la policía a reprimir les protestes obreres teníen la cara dura de presentase a ponese como exemplu de solidaridá y facese un bon llaváu de cara. Si la hipocresía fuere agua, aquellos díes hubieren sido los del diluviu universal.

Ya van 20 años d`aquelles muertes, y los mineros siguen morriendo nel tayu, a pesar de la “bona intención” de los estremaos gobiernos que tan faciendo tolo que puen pa que nun muerra nin unu más cola senciella midía de pesllar les mines, una cantinela que lleva amenazando 40 años a les Cuenques Mineres. Va un añu morrien 6 compañeros na Hullera Vasco-Leonesa, y nun va dos meses cayía un camarada d`esti Partíu trabayando en Asturleonesa, na llocalidá de Zarréu (Degaña). Y los mesmos aguarones siguen apaeciendo pa dar unos pésames que nin sienten nin-yos importen.

En el 20º aniversariu van facese homenaxes istitucionales y d`empresa a los 14 compañeros muertos. Los xestores d`HUNOSA puestos pol gobiernu y que lleven a la empresa a la destrucción total con una xestión catastrófica, y amenorgando les midíes de seguridá, van encabezar estos homenaxes. Con ellos nun van el mugor y el miéu en el tayu de tolos díes, nun va con ellos tampoco la inquietud diaria de quien nun sabe que va ser del so trabayu el día de mañana, pa ellos nun esisten los apuros a fin de mes porque la redución de salarios nel seutor mineru ye enorme, tanto nel seutor públicu como nel priváu, y nun falemos de les socontrates, vamos dexar la descripción del terror pa otru díi.

El Partíu Comunista de los Pueblo d`España quier, n`esti negru aniversariu, tresmitir el so sofitu a les families y compañeros de tolos mineros muertos, nel tayu o en casa, llevando nel so cuerpu les cicatrices físiques y sicolóxiquesdel trabayu. El Partíu quier mandar un abrazu solidariu a cualquiera que haya perdido a un familiar, a un compañeru, a un collaciu... y declara la so intención de siguir lluchando pa que apaezan y paguen los culpables de cada acidente, pa que les mines sigan abiertes, dando trabayu y futuru, pero en condiciones de seguridá llaboral. El PCPE, homenaxea a la familia minera, a la xente minera, parte esencial de la clase trabayadora, y que amuesa argullu y llucha en toles ocasiones.

Seguiremos peleando xuntos por un mundiu meyor, por una sociedá socialista onde los que trabayen seyan los que manden, onde nun esista el robu de lo que producimos por parte de los que mos esploten, onde la vida de los trabayadores valga más que la avaricia de los empresarios.

EN RECUERDU DE LOS 14 DE NICOLASA, DE TOLOS MINEROS MUERTOS, DE TOLOS TRABAYADORES QUE DEXEN LA VIDA NEL TAYU.

PUXA LA XENTE MINERA

PUXA LA XUNIDÁ OBRERA

PUXA LA LLUCHA DE LA CLASE OBREA